తెలుగు టీవిలో అవెంజర్స్ హల్చల్

టీవీ రేటింగ్స్ లో ఎప్పుడూ స్టార్ హీరోల సినిమాలదే టాప్. హయ్యస్ట్ టీఆర్పీలు వాటికే వస్తుంటాయి. డబ్బింగ్ సినిమాలు టాప్ లో నిలిచిన దాఖలాల్లేవు. ముఖ్యంగా హాలీవుడ్ చిత్రాలు రేటింగ్స్ లో అగ్రస్థానం మాత్రం ఎప్పుడూ దక్కలేదు. మొదటిసారి ఓ సినిమా చరిత్ర సృష్టించింది. టీఆర్పీల్లో నంబర్ వన్ స్థానంలో నిలిచింది. దాని పేరు "ఎవెంజర్స్-ఎండ్ గేమ్". లాక్ డౌన్ మహత్యం ఇదంతా.

బుల్లితెరపై స్పైడర్ మేన్, సూపర్ మేన్, బ్యాట్ మేన్ నుంచి ఎక్స్-మెన్ వరకు ఎన్నో ప్రతిష్టాత్మక డబ్బింగ్ సినిమాలు ప్రసారమయ్యాయి. జేమ్స్ బాండ్, టామ్ క్రూస్ మూవీస్ కు కూడా ఎప్పుడూ నంబర్ వన్ రేటింగ్ రాలేదు. కానీ ఈనెల 17న స్టార్ మా ఛానెల్ లో ప్రసారం చేసిన ఎవెంజర్స్-ఎండ్ గేమ్ కు మాత్రం రికార్డ్ స్థాయిలో 5.09 రేటింగ్ రావడం విశేషం. ఓ ఇంగ్లిష్ డబ్బింగ్ సినిమాకు ఈ స్థాయిలో రేటింగ్ రావడం ఇదే ఫస్ట్ టైమ్.

లాక్ డౌన్ కావడం, ఈ వారం వరల్డ్ టెలివిజన్ ప్రీమియర్స్ లేకపోవడం వల్ల థానోస్ కు పట్టంకట్టారు బుల్లితెర వీక్షకులు. అలా ప్రపంచవ్యాప్తంగా సూపర్ హిట్టయిన ఈ సినిమా తెలుగు టీవీ తెరపై కూడా క్లిక్ అయింది.

ఇక ఈ వారం టాప్-5 సినిమాల్లో ఎండ్ గేమ్ తర్వాత స్థానంలో "90ఎంఎల్ నిలిచింది. ఇప్పటికే వరల్డ్ టెలివిజన్ ప్రీమియర్ కింద రికార్డ్ రేటింగ్ సాధించిన ఈ సినిమా, ఈవారం కూడా నంబర్ వన్ స్థానంలో నిలిచి ఉండేది. కానీ ఎవెంజర్స్ వల్ల తృటిలో ఆ ఛాన్స్ తప్పిపోయి, 5.07 టీఆర్పీతో రెండో స్థానంలో నిలబడాల్సి వచ్చింది. ఇక మూడో స్థానంలో లక్ష్మీకల్యాణం, నాలుగో స్థానంలో డాడీ, ఐదో స్థానంలలో పౌర్ణమి  సినిమాలు నిలిచాయి