బాహుబలి 2 : లేటెస్ట్ కలెక్షన్లు (12 రోజులు)

ప్రపంచవ్యాప్తంగా గ్రాండ్ గా రిలీజైన బాహుబలి-2 సినిమా ప్రతి ఏరియా నుంచి కళ్లుచెదిరే కలెక్షన్లు సాధిస్తోంది. ఈ సినిమాకు వస్తున్న వసూళ్లు చూసి ట్రేడ్ పండిట్స్ కూడా కళ్లుతేలేస్తున్నారు. ఇప్పటికే వెయ్యి కోట్ల క్లబ్ లోకి చేరిన ఈ సినిమా ఆంధ్రప్రదేశ్, తెలంగాణ రాష్ట్రాల నుంచి రికార్డు స్థాయిలో వసూళ్లు సాధిస్తోంది. మరీ ముఖ్యంగా తెలంగాణలో ఈ సినిమా చరిత్ర సృష్టించింది. నైజాంలో ఫస్ట్ టైం 50కోట్ల షేర్ క్లబ్ క్రియేట్ చేసింది బాహుబలి-2. ఇప్పటివరకు ఇంత షేర్ అందుకున్న సినిమా ఇంకోటి రాలేదు. విడుదలైన 12 రోజుల్లో ఈ సినిమా తెలుగు రాష్ట్రాల్లో 151.90 కోట్ల రూపాయల షేర్ రాబట్టింది.

అటు బాలీవుడ్ లో కూడా ఈ సినిమా బంపర్ కలెక్షన్లతో సాగిపోతోంది. బాలీవుడ్ లో ఇప్పటికే వసూళ్ల పరంగా నంబర్ వన్ స్థానం సంపాదించుకున్న ఈ సినిమా.. ఇప్పటికీ బాక్సాఫీస్ వద్ద అదే జోరు చూపిస్తోంది. 12వ రోజు బాహుబలి-2 హిందీ వెర్షన్ కు 15.5 కోట్ల రూపాయల షేర్ వచ్చింది. 12 రోజుల్లో హిందీ వెర్షన్ కు 359.75 కోట్లరూపాయల షేర్ వచ్చింది.

మరోవైపు ఓవర్సీస్ లో కూడా ఈ సినిమా తన హవా చాటుతోంది. మంగళవారం ఈ సినిమాకు 3లక్షల16వేల డాలర్లు వచ్చాయి. ఉత్తర అమెరికా, కెనడా దేశాల్లో వచ్చిన కలెక్షన్ల మొత్తమిది. ఈ మొత్తం కలుపుకుంటే.. విడుదలైన 12 రోజుల్లో ఓవర్సీస్ లో ఈ సినిమా 17 మిలియన్ డాలర్లు ఆర్జించింది.

మరోవైపు ఓవరాల్ వరల్డ్ వైడ్ వసూళ్లలో బాహుబలి-2 సినిమా రికార్డుల మీద రికార్డులు సృష్టిస్తోంది. ఈ 12 రోజుల్లో ఈ సినిమాకు ప్రపంచవ్యాప్తంగా 1200 కోట్ల రూపాయలు వచ్చాయి.